LEGAZPI CITY-Pigkwestyon ni Ombudsman Jesus Crispin “Boying” Remulla an kalidad kan mga pigtutugdok na proyekto kan Department of Public Works and Highways (DPWH) para sa manlaen-laen na ahensya kan gobyerno.
Sa saiyang programa, sinabi ni Remulla na mas mapapaotob an mga darakulang proyekto sa paagi kan public-private partnership (PPP).
Kabali sa mga sinambit niya, iyo an labing P9-billion na UP-Philippine General Hospital Cancer Center, na dae suboot nakaresibe nin bidder.
Pigkwestyon man ni Remulla an Bureau of Immigration building project na nagkakantidad nin labi sa P8 bilyones, na suboot haloy nang piggigibo.
Propwesto man kaini sa National Bureau of Investigation na imbes na maggibo nin bagong edipisyo, pwedisir na sana ining magbakal nin eksistidong edipisyo hale sa pribadong sektor.
Nag-uyon si DPWH Secretary Vince Dizon sa nagkapirang punto ni Remulla, partikularmente sa paggamit kan public-private partnership para sa mga darakula asin komplikadong proyekto.
Segun ki Dizon, makakatabang ini na masierto an mas marikas na konstruksyon, mas halangkaw an kalidad asin cost efficiency kan mga proyekto.
Aminado man si Dizon na dae siya nakuntento sa kalidad kan nagkapirang proyektong pigsasagibo kan DPWH, kabale na an edipisyo kan Bureau of Immigration.
Sinabi man kaini na andam an ahensya na pugulan an ngonian na proyektong edipisyo kan NBI ngani na makahanap nin mas praktikal na opsyon an ahensya para sa saindang bagong headquarters.
