Pigsierto kan presenteng Ombudsman na si Jesus Crispin ‘Boying’ Remulla na pag-aadalan niya an reklamong isinangat ni dating Sen. Antonio Trillanes IV sa opisina.
Segun ki Ombudsman Remulla, rerepasohon o maagi sa evaluation an nasabing reklamo kun saen gigibuhon an fact finding.
Asin kun kinakaipuhan, segun sa nasambitang opisyal, posible man na magkondusir nin preliminary investigation an panel of prosecutors kan Ombudsman.
Isinunad ni dating Senador Trillanes an mga reklamong pagbayolar sa Plunder Law sa irarom kan Republic Act No. 7080, Anti-Graft and Corrupt Practices Act kan RA No. 3019 asin Code of Conduct for Public Officials kan RA No. 6713.
Saiyang ipigrereklamo sinda Sen. Bong Go asin former President Rodrigo Roa Duterte katakod sa pagkaka-imbwelto sa paggawad nin nasa 7-bilyon piso kantidad kan mga infrastructure projects sa kumpanyang pagsasadiri suboot kan ama kan Senador.
Mantang aminado si Ombudsman Remulla na dae siya nagkaigwa nin pagkakataon na mahiling an nasabing reklamo kan siya an kalihim pa kan Department of Justice.
Magigirumdumang isinunad ni former Sen. Trillanes an kaparehong ‘plunder case’ laban kinda Go asin Duterte kan nakalihis na taon na isinumite man kan kagawaran sa Ombudsman.
Agrangay niya an kawaran nin aksyon kan ini an maidara sa Ombudsman asin inakusaran pang dae lamang suboot pig-alokaran nin oras nganing magbukas nin imbestigasyon.
Nagsayuma si Ombudsman Remulla na kumpirmaron ini huli ta abo niya suboot na pangenotan an mapadapit sa isyu.
