LEGAZPI CITY—Niyugo nin 5.9 magnitude na linog an lugar harani sa main island kan Okinawa, Japan kaiba an Kagoshima prefectures kan Mayo 20, pasado alas-11 nin aga, oras sa Japan.
Segun ki Bombo International Correspondent in Japan Myles Briones Beltra, sa intrevista kan Bombo Radyo Legazpi, na makusog an nasabing pagyugo na nag-abot sa lagpas 5 intensity an linog.
Katakod kaini nagpaluwas an gobierno nin abiso sa mga nakaistar na yaon sa isla na magin maingat, mapagmatyag asin updated sa mga bareta en kaso na magkaigwa nin mga aftershocks.
Dugang ni Beltra na wara man na huma nin tsunami sa isla asin warang nairehistrong casualties.
Mientrastanto, mensahe man kaini sa mga may kaparientes sa Okinawa asin Kagoshima prefectures na ipagpangadyi na warang may mairehistrong aftershocks an nasabing 5.9 magnitude na linog para man sa ‘peace of mind’ kan mga namamanwaan digdi.
