LEGAZPI CITY – Nakapagrehistro an Office of the Civil Defense Bicol nin kabilugang 21 flooding incidents durante kan warang patod na pag-uuran na na-eksperyensyahan sa rehiyon.
Segun ki Office of the Civil Defense Bicol Spokesperson Gremil Naz sa intrevista kan Bombo Radyo Legazpi na an Legazpi City, Donsol asin Sorsogon City an mga syudad asin banwaan na binaha kan nakaaging aldaw.
Base sa saindang datos na 11 an nairehistrong pagbabaha sa Sorsogon City, 9 sa syudad kan legazpi asin saro sa Donsol.
May mga nakaeksperyensya man suboot nin abot liog hasta lagpas tawo na pagbabaha.
Pigtaram pa kan opisyal na labi 3,000 an mga tawo na nagtenir sa mga evacuation center nin huli sa pagbabaha na dara kan raot nin panahon.
Sa ibong kan mga pag-uuran sa rehiyon, wara man suboot na naitala an ahensya nin mga insidente pagrasay kan daga.
Sa presente, nag subside o naghupa na man an tubig baha sa mga nagkapirang lugar sa rehiyon asin nakakamati na nin maray na kamugtakan kan panahon.
Pigsyerto ni Naz na padagos an saindang monitoring kan sitwasyon asin pangapodan sa publiko na permihang magpreparar nin huli ta posible suboot na maka-eksperyensya pa nin pag-uuran an enterong provincia kan rehiyon Bicol.
