LEGAZPI CITY — Ipigpapa-validate ngonian sa Regional Project Validation team an gabos na quarrying operations sa pamitisan kan Mayon volcano katakod kan preparasyon sa paglaog kan tag-uran sa rehiyong Bicol.
Sa intrevista kan Bombo Radyo Legazpi kay Office of the Civil Defense (OCD) Bicol Dir. Claudio Yucot, nagtao na nin rekomendasyon an ahensya asin Philippine Institute of Volcanology and Seismology (PHIVOLCS) na dae muna ipaglawos an proyekto sa itaas kan bulkan.
Pag-eksplikar kan opisyal, ipigrekomendar nindang ibaba sa pamitisan kan Mayon an anti-lahar asin anti-flooding projects huli ta mas dakol an mga residenteng apektado sa baba kaini.
Segun ki Yucot, dakulang tabang an mga dike projects urog na sa panahon nin tag-uran kaya mas marhay na gibuhon ini kun sain mas dakol na Albayano an apektado mientras na ipagpapadagos na sana an kaparehong proyekto oras na magkaigwa nin dugang na pondo.
Mientras tanto, pinaglalaoman man na ipapaluwas ni PHIVOLCS resident volcanologist Dr. Ed Laguerta an dugang na report dapit sa qurrying project sa Mayon area huli sa pagkahadit na makaiba an quarry resources sa pagbaba kan loose materials sa bulkan oras na magkaigwa nin makusog na pag-uran.
