LEGAZPI CITY – Nagpaliwanag sa Bombo Radyo Legazpi an alkalde kan Oas, Albay makalihis an nagdadakol na reklamo sa pagkawara nin suplay kan tubig sa tulong barangay sa banwaan, na warang abiso.
Sa intrevista ki Mayor Domingo Escoto, dakol suboot an naka-tap na illegal connection sa Barangay Rizal, Iraya Sur asin Iraya Norte.
Sa paglaom na naka-tap an mga ini sa Number 3 pipeline kan patubig asin dae man maapektaran kan pagbabalyo kan linya kan tubig sa Number 6 main pipeline, dae na nagbaba nin abiso sa patrabaho na proyekto kan Department of Public Works and Highways (DPWH).
Kan punan an patrabaho kan Hunyo 7, naaraman na dakol palan an iligal na nakakabit an linya sa Number 6 asin pigtutubudang dae man nagbabayad nin tamang konsumo sa tubig.
Segun pa ki Escoto na labi sa 40 sana an mga lehitimong konsumidor sa lugar mantang ipigsagibo man an proyekto tangarig na maparahay an servicio sa mga ini.
Abiso man ni Escoto na makipagkoordinar na sa Oas Water System sa pagresolbar sa isyu sa illegal tapping kan linya kan tubig.
Maduon man na pignigaran ni Escoto an akusasyon na pulitika an rason kun nata dakol an nawaran nin suplay nin tubig sa banwaan.
Inasegurar man kan alkalde na nagsasagibo na nin pagrarasyon nin tubig sa mga barangay na apektado katabang an provincial government.
