LEGAZPI CITY – Nakatalaan na tawanan nin honra kan Bicol University College of Nursing an sarong nursing student na matrayumpong nagpaaki sa kapwa kaini pasahero na lunad kan sarong pampasaherong van.
Sa intrevista kan Bombo Radyo Legazpi ki Dr. Maria Bernardita, dean kan BUCN, tatawan suboot ninda nin service award asin medalya an estudyante na si JM Cabarle huli sa kusog nin buot asin kabayanihan kaini sa pagsasalbar nin pasyente.
Napag-araman na dae nagin madali an ginibo ni Cabarle huli ta nakaburubod pa an umbilical cord kan umboy sa saiyang hawak alagad nagibo kaining ma-asses an dapat na gibuhon asin naisalbar an umboy asin an ina kaini antes pa man nadara sa ospital.
Pagbuyagyag pa kan nasambitan an dean na sarong dean’s lister si Cabarle asin sarong dedikadong estudyante na ngunyan an magseserbi na man na modelo sa saindang kolehiyo asin sarong patunay na an mga estudyante kan Unibersidad an malalaoman sa pagibo kan saindang responsibilidad.
Mientrastanto, sa suway na intrevista, pighayag man kan saro sa mga propesor ni Cabarle na si Dr. Bebian Alparce na magayon an training ninda sa mga estudyante asin pirmihan ninda ining pigtataraman na kinakaipuhan na ma-enhance an saindang mga kaaraman asin skills ngani na makapagserbi sa komunidad maski sain man sinda magduman.
