LEGAZPI CITY- Apelar ngonian kan pamayo kan Naga City an klaripikasyon sa ipigtutukdong peryodo ni Presidente Rodrigo Duterte makalihis an komentaryo na “hotbed kan shabu” an ciudad.
Sa ekslusibong intrevista kan Bombo Radyo Legazpi ki Naga City Mayor John Bongat, nagngangalas ini kun nata ngonian sana nagluwas an binutasang impormasyon ni Duterte siring man an ginibong “branding” sa lugar.
Patotoo pa ni Bongat na nunca na natawanan nin alias bilang “shabu hotbed” an lugar sa 18 taon na pagsisirbe mantang ipapaapod man an mga ahensya kan Philippine Drug Enforcement Agency (PDEA), Philippine National Police (PNP), Criminal Investigation and Detection Group (CIDG) asin National Bureau of Investigation (NBI) sa pag-eksplikar sa nasabing isyu.
Segun pa ki Bongat na problema magin sa ibang lugar an iligal na droga alagad garing nasentro sana sa ciudad an atensyon kun kaya hirit man na masarado na an isyu asin pag-olayan na sana sa tamang platform.
Kinontra pa kan opisyal an alyas urog na dae man suboot nagpabaya sa kampanya kontra sa iligal na droga mantang inengganyar an gabos na magtarabangan sa pagpulbos kan problema.
