LEGAZPI CITY – Narisa kan pirang flower vendor sa Legazpi City Public Market na mas halangkaw an numero kan mga nagbabarakal nin burak kan nakaaging undas kaysa ngonian na Valentine’s Day.
Segun ki Myrna Ilagan sa intrevista kan Bombo Radyo Legazpi na huli ini sa mas pigtatawan nin importansya kan nagkapira an undas nganing rumdumon an saindang namaaram nang padangat sa buhay mantang napapagalan man an iba na magbakal nin burak nganing iselebrar an aldaw kan mga puso.
Pwedesir man suboot na nagluya ngonian an numero nin mga parabakal huli sa labing halangkaw kan presyo kan mga burak asin an nagdadakol na supply na kabaligtadan an nangyayari.
Alagad sa ibong kaini an kumpyansa ini na makakaguno siya nin ganansya ngonian huli ta nahihiling niyang naghihingoa an publiko na magbakal nin burak asin itao sa saindang padangat sa buhay.
Nagtutubod man an naunambitang paratienda na madakol pa man liwat an mga mabarakal nin burak sa ibong kan manlaing-laing kalamidad man an tumama sa rehiyon kan Bicol.
Kadaklan man suboot sa saindang mga pigti-tiendang boquet an nagkakawat sa P2,500 sagkod P3,500 depende sa size asin klase nin burak na ginamit mantang may mga supply man sinda kan mga imported na burak asin an pamosong roses.
Pigtutukdo man nindang mga rason sa pagtaas kan mga presyo kan mga burak iyo an malipot na temperatura sa Baguio, transportasyon, asin iba pang kadifisilan pasiring sa ciudad.
Piglalaoman man ni Ilagan na may mabarakal pa man liwat nin burak sagkod saaga, Pebrero 15 huli ta pwedesir na an iba sa mga ini an naghahalat na magbaba an presyo alagad paglilinaw niya man na mabawi sana ninda an saindang puhunan an magpapadagos sinda pagti-tienda.
