LEGAZPI CITY – Nadakop kasubagong aga kan mga otoridad an pigkokonsiderar na number 1 sa priority target list sa Lambat-Sibat kan Guinobatan Municipal Police Station sa isinagibong operasyon kan pinagsarong pwersa kan Albay Provincial Public Safety Company, Regional Intelligence Unit kan Bicol asin Region 4-A (Calabarzon), Tiaong MPS asin Quezon Police Intelligence Branch.
Sa impormasyon naguno kan Bombo Radyo Legazpi, pinamayuhan ni PC/Insp. Cecilia Zuñiga kan Guinobatan MPS an nasabing operasyon kun saen nadakop an paraomang Pablito Marasigan, 54 anyos, residente kan Sitio Gaboc Brgy. Upper Binogsacan sa nasabing banwaan.
Sa beripikasyon kan RIU-Bicol asin RIU-Calabarzon, nadiskubreng pang-anom man ini sa Provincial most wanted list kan Quezon PPO.
Nahahampang an suspek sa kasong murder base sa inisyung mandamiento de aresto ni Judge Stephen Cruz, RTC Branch 60 kan Lucena City kan petsa 7 kan Mayo 2004.
Sa presente, nasa custodial facility kan hepatura kan Guinobatan an nasabing suspek para sa magkakanigong disposisyon.
