LEGAZPI CITY — Wara nang dulag an sarong lalaki na imbwelto sa kalakaran kan iligal na droga makalihis na maarestar kan mga otoridad sa Pinagbuhatan Pasig City, Metro Manila.
Nabisto an suspek na si Christopher Torrecampo alyas “Opel” na napag-araman na pang apat sa municipal most wanted person sa banwaan kan Baras sa probinsya kan Catanduanes.
Ikinasa an operasyon kan pinagsarong pwersa kan Pasig City Police Station asin Baras Municipal Police sa bisa kan mandamiento de aresto na ipinaluwas ni Hon. Judge Lelu Contreras kan RTC branch 42 kan Virac, Catanduanes.
Ini an katakod kan kasong pigkakahampang ni Torrecampo na pagbayolar sa Section 6, 11 asin 12 kan Article II kan Republic Act 9165 o an Comprehensive Dangerous Drugs Act of 2002.
An saiyang kasong pigkakahampang an warang pigrerekomendar na piyansa.
