LEGAZPI CITY—Nagpahayag nin suporta an grupong National Union of Journalists of the Philippines – Albay sa sarong student publication kan sarong eskwelahan sa probinsya kan Camarines Sur katakod sa suboot pangha-harass asin pananakot digdi huli kan resulta kan sarong pre-election survey.
Segun ki National Union of Journalists of the Philippines – Albay chapter Director, Reynard Magtoto, sa intrevista kan Bombo Radyo Legazpi, na sarong trayumpo ini para sa naunambitang student publication huli ta nanindugan sinda para ipahiling an katotohanan.
Pigtaram ni Magtoto na alagad saro ining local asin sa laog sana kan eskwelahan kinundusir an pre-election survey, dakula an nagin epekto para maaraman an mga katangian kan mga lokal na politiko.
Dugang kan opisyal na dapat irespeto kan siisay man na mga opisyal an ipiglunsar na mga survey kan sarong publication.
Sainda man na pigkondena an lakdang sa pangha-harass sa staff kan naunambitang student publication.
Mientrastanto, pigtaram pa ni Magtoto na plano man na pag-adalan asin pag-olayan na sa legislative agenda mapadapit sa isyu para man sa kapakanan kan mga mamamahayag.
Nagpasalamat man an opisyal sa mga student publications na nagpahiling nin pakisumaro sa nangyari sa sarong student publication sa Camarines Sur.
