LEGAZPI CITY—Kinondena kan grupong National Union of Journalists – Albay Chapter an pahayag kan sarong opisyal kan gobyerno kun saen pigtaram kaini na mas mawot niya suboot na magtao nin intrevista sa state-media huli ta mas pigsusuportaran kan mga ini an inisyatiba kan gobyerno kumpara sa mga pribadong media sa Bicol.
Segun ki NUJP Albay Chapter Chairperson Mavic Conde, sa intrevista kan Bombo Radyo Legazpi, na kan nagluwas an nasambit na pahayag enot na nakaabot sainda iyo an pagkadisganar kan mga miembro kan media kun saen nakulogan sinda kun nata arog suboot kaito an pahayag kan sarong opisyal kan gobyerno.
Dugang ni Conde na bako sana ini kawaran-respeto sa mga pribadong media kundi magin sa kapwa kaini kaparehong opisyal kan gobyerno na nasasabutan an trabaho kan media bilang sarong watchdog.
Pig-eksplikar man kaini na an state-media pigpapaboran asin an ipapaluwas na bareta iyo an gikan sa mga programa kan gobyerno na sarong magayon na paagi para matawan nin impormasyon bako sana an mga pribadong media kundi pati na man an publiko, mantang an pribadong media an “ma-complement” sa mga pagmakulog kan publiko siring na sana kun may mawot sindang ihapot—na dae pa na-cover kan state-media, kun saen digdi na man suboot may mas maitatabang pa an pribadong media.
Kun kaya segun ki Conde na bako magayon na may pigpaboran an sarong opisyal kan gobyerno sa pag-disseminate nin mga bareta lalo na pag-abot sa mga kalamidad.
Katakod man kan paghagad nin despensa kan nasambit na opisyal kan gobyerno, pigtaram ni Conde na magayon man na naaraman kan nasambit na opisyal an concerns kan pribadong media, alagad dapat man suboot na mahiling ini sa aksyon.
Siring man, nagmamawot man ini na pag-adalan asin i-appreciar an trabaho kan independent press sa sarong demoktrakong komunidad.
Mientrastanto, na-appreciar man kan saindang grupo an publiko na nasasabutan an trabaho kan mga pribadong media siring man an pag-appreciar sa paghagad despensa kan naunambitang opisyal.
Nagpagiromdom man ini na bako kaiwal an sarong independienteng media.
