LEGAZPI CITY- Nagpatanid an mga otoridad sa publiko sa padagos na naglalakop na mga text scams urog na ngunyan na pagsabat kan bagong taon.
Segun ki National Telecommunications Commission Bicol Engineer II Engineer William Ramon Luber sa intrevista kan Bombo Radyo Legazpi na basado sa datos kan ahensya kan Disyembre 27 nakaresibe na nin mga reklamo an ahensya makalihis na mabiktima nin text scam.
Katakod kaini, pinayuhan kan opisyal an publiko na ibitaran an pag-click nin mga link na saindang nareresibe.
Afuera digdi, pigbabantayan man an naglalakop na bagong modus na parcel scam kun sain pigagamit kan mga scammers an orders kan mga biktima ngani na makakulimbat nin kwarta.
Komon na pighahagadan nin bayad an mga biktima saka papararahan nin mga link na suboot konektado sa bank accounts kan mga ini saka makukulimbat an laog kan saindang mga bangko o e-wallet.
Sinierto man kan opisyal na pig-aaksyunan kan ahensya an gabos na klase nin scam ngani na madakop an mga nasa likod kaini.
Segun ki Luber na nakikipagtabangan sinda sa Regional Anti-Cybercrime ngani na mas mapadali an pagtataong aksyon sa mga text scam.
