LEGAZPI CITY- Nagpapadagos ngunyan an pigigibong restoration kan mga cell sites na labing naapektaran kan nakalihis na mga kalamidad.
Ini an sa tahaw kan problema sa connectivity kan nagkapirang mga telecommunications company.
Segun ki National Telecommunications Commission Bicol Officer in Charge Atty. Judy Ann Bilanghel sa intrevista kan Bombo Radyo Legazpi na nagluwas sa monitoring kan ahensya na labing naapektaran an provincia kan Catanduanes asin Camarines Norte.
Pagbuyagyag kan opisyal na sa parte kan Catanduanes nasa 63% an affected cell sites mantang nasa 49% man sa Camarines Norte.
Huli digdi, puga-puga na an pagtatrabaho kan mga telecommunications company ngani na maibalik an mobile connectivity huli ta dakol na mga namamanwaan an nakaka eksperyensya nin problema sa komunikasyon.
Segun pa ki Bilanghel na dakol na mga telecommunication groups an naglalaom sa commercial power kaya kun mapaparikas an pagbabalik kan suplay nin kuryente, mas mapapadali man an pagbabalik kan linya kan mga telcos.
