LEGAZPI CITY- (Update) Kinondenar kan National Press Club (NPC) an panggagadan sa mediaman na si Joaquin “Dos por dos” Briones Jr. sa probinsya kan Masbate.
Sa ipinaluwas na statement kan NPC sa Facebook page kaini, nagpahayag ini nin pakikidumamay sa pamilya ni Briones katakod kan mensaheng pirming gigirumdumon an nasambitan na kolumnista asin komentarista sa radyo bilang makusog na suportedor kan liderato kan NPC.
Nakipag-koordinar na man suboot ini sa Presidential Task Force on Media Security sa pagtao nin hustisya sa nasambitan na journalist.
Katakod kaini, matao suboot an opisina nin reward na P200,000 sa siisay man na makakatabang sa pagbisto asin pagdakop sa mga nasa likod kan paggadan ki Briones.
Dae na man pinangaranan an “donor” kan nasambitan na rewar na nagkusog-boot sanang magtabang sa ikareresolbar kan kaso sa dugang na naman na listahan kan media killings.
Sa ibong kan pang-aatake sa mga taga media sa nakalihis na mga taon, nagtitinir suboot na matibay an NPC asin magpapadagos sa pamamayo sa libreng pamamahayag siring man sa paghagad nin hustisya para sa gabos na ginadan na miyembro an media.
