LEGAZPI CITY – Padiit-diit nang nagluluya an kusog kan rebeldeng grupong New People’s Army (NPA) sa Kabikolan magin an kapasidad kaining makagibo nin mga magagabat na pananakot sa mga ordinaryong namamanwa.
Sa personal na pagbisita ni Capt. Joash Pramis, tagapagtaram kan 9th Infantry Division na nakabase sa Pili, Camarines Sur, inihayag kaining lima sa sampulong tawo an rating kan mga aktibidad na ipigsasagibo kan rebeldeng grupo na maaapod na suboot bilang ‘manageable’.
Dugang pa kaini, kaya nang maresolbaran kan mga suldados an security threats sa mga lugar na pigdudumanan kan mga ini sa pagsagibo nin mga extortion activities mantang wara man na pigkokonsiderar na ‘severely influenced area’ sa rehiyon.
Aminado man ining nagtetenir an pangingikil kan mga rebelde sa mga tirios na kahimanwa alagad limitado na sana.
Apwera digdi, inihayag pa ni Pramis na nakatutok an atensyon kan Pwersa Armadas kan Pilipinas sa pagpapakusog kan saindang pwersa kun saen bukas na an recruitment para sa mga magti-train na mga bagong suldados.
Sa huri, dae kaini nalingawang iengganyar an publiko na suportaran an laban kan gobyerno kontra sa mga rebeldeng grupo.
