LEGAZPI CITY — Nakadulag an sarong miyembro kan New People’s Army (NPA) sa mga otoridad makalihis na sirbehan nin mandamiento de aresto para sa kasong murder asin attempted murder sa Sitio Burabod Barangay Malibas Palanas, Masbate.
Binisto kan Palanas Municipal Police an suspek na si Jerome Verdia na residente kan nasambitan na lugar.
Nagtarabangn an Palanas MPS, 2nd Infantry Batallion kan Philippine Army na nakabse sa Brgy. Bacolod, Milagros, asin iba pang ahensya ngani na maarestar an nasambitan na NPA member alagad nakadulag suboot ini mantang nadakop an live-in partner na si Alma Moreno, 27-anyos.
Narekober sa posisyon n Moreno an 18 pidaso nin bala para sa 5.56 mm na kalibre nin badil, duwang pidaso nin bala para sa calibre 45, pitong bala para sa kalibre 38 asin duwang .357 revolver na dae nin serial number.
Nasa kustodiya na kan nasambitan na pulisya an nadakop na live-in partner ni Verdia siring man an mga nakumpiskar na ebidensya.
Sa presente, pighahanda na an kasong isasangat kontra sa nadakop na suspek.
