LEGAZPI CITY- Sarong miyembro kan New People’s Army (NPA) an nagadan sa panibagong engkwentro sa pagultanan kan tropa kan gobyerno asin kan mga rebelde sa Sitio Public, Barangay Itok sa banwaan kan Capalonga, Camarines Norte.
Susog sa ipinaabot na impormasyon ni Brig. Gen. Rolando C. Manalo, Brigade Commander kan 902nd Infantry Brigade ki Maj. Gen. Manolito P. Orense, Commander kan 9th Infantry Division kan Philippine Army, nakabakbakan kan mga militar gikan sa 9th Infantry Batallion an poco mas o menos limang miyembro kan NPA mientras na nagsasagibo nin combat operation.
Nawalat sa pagdulag kan mga rebelde an bangkay kan saro nindang kaibanan makalihis an limang minutong bakbakan.
Narekober kan mga soldados an sarong M16A4 rifle, mga bala asin iba pang gamit kan bandido.
Tulos man naglunsar nin pursuit operation an militar kontra sa mga nagdurulagan na NPA pasiring sa direksyon kan Barangay Lucbanan kan parehong banwaan.
Sigon ki Maj. Gen. Orense, padagos sindang madisignar nin mga soldados sa mga istratehikong lugar ngani na mapugulan an mga kadahasan asin pangingikil kan rebeldeng grupo.
Presente suboot na nakakaeksperyensya nin labing kadipisilan asin takot an NPA huli sa mga matrayumpong combat operations na nagresulta sa pagkagadan kan nagkapira sa saindang mga kaibanan asin pagkasamsam kan mga makukusog na armas asin gamit.
