LEGAZPI CITY — Wara nang kawala sa kamot kan mga otoridad an sarong akyat bahay gang member makalihis nan ipigkondusir na operasyon kan kapulisan sa laog kan school campus kan Brgy. Zone 8, kan Bulan, Sorsogon.
Sa impormasyon hali sa Bulan Municipal Police Station, nagahagad suboot nin police assistance an head security kan Bulan National High School makalihis na magduda na hinabon an ipigpapabakal na laptop kan duwang personalidad sa saindang eskwelahan.
Sa pagresponde kan mga otoridad, tulos na ipigsagibo an sarong inquiry kun sain mismong an school teacher na si Madelyn Calingacion an nag-inspeksyon sa laog kan laptop na napag-araman na pagsadiri palan kan sarong Aura Keena Tabuena na sarong maestra asin residente kan Brgy. Sagpon, Daraga, Albay.
Nag-match man sa pagsasaladawan kan nawawarang laptop ni Tabuena an kapot kan suspek kaya digdi nagdesisyon an mga otoridad na dakupon an duwa na nabistong sinda Suzette Palacio asin Bernardo Valeriano Niemo Jr., 30-anyos na napag-araman na miyembro kan Gubat Akyat Bahay Criminal Gang.
Mientrastanto, nanuntok pa nin pulis asin nagbalong magdulag si Niemo mantang lunad kan mobile patrol car alagad marikas man na naarestar kan mga otoridad.
Sa presente pighahanda na an kasong pagbalgar sa Presidential Decree 1612 o The Anti-Fencing Law na isasangat kontra ki Niemo mantang na-release sa kustodiya kan Bulan MPS an kaibanan kaining si Palacio makalihis mag-execute kan Judicial Affidavit bilang witness kontra sa suspek.
