LEGAZPI CITY-Nagkondusir an North Korea nin sarong intermediate-range strategic missile drill na pinangenotan kan lider na si Kim Jong Un, segun sa media kan nacion.
An missile piglansar kan Sabado gikan sa sirangan na parte kan North Korea asin pigbabaretang tinamaan an sarong target na 1,000 kilometros na distansya sa dagat.
An pag-ensayo, obheto na sanayon an mga tropa sa pagpadalagan kan hypersonic strategic weapon system asin nganing baluon an mga kakayahan kan saindang sistema nin armas.
Nadetect kan militar kan South Korea an paglansar kan ballistic missile asin pigtatantya na naglupad nin labi sa 700 kilometros an missile antes nahulog sa kadagatan sa east coast kan Korean Peninsula.
Sinabi ni Kim Jong Un na an Pyongyang dapat na padagos na pakusugon an mga strategic weapons asin nuclear deterrent kaini para sa national security.
An missile test nangyari sa tahaw kan nag-uurog na tensyon sa Korean Peninsula, kasunod kan pagsabog nin landmine sa Demilitarized Zone kun sain nairido an mga soldados kan South Korea.
An North Korea nagkondusir nin labing 10 missile tests ngonian na taon.
