LEGAZPI CITY – Importante sa non-profit research institution na IBON foundation an State of the Nation Address nganing ilatag ni Presidente Ferdinand Marcos Jr. asin kan Gobierno an mga tunay na kamugtakan asin problemang pigkakahampang kan nacion.
Segun ki Ibon Foundation Executive Director Sonny Africa sa intrevista kan Bombo Radyo Legazpi na dae man dapat mawara an paglatag kan impormasyon manungod sa kamugtakan kan ordinaryong pilipino asin an tapat na serbisyo sa pang-urualdaw na buhay huli ta kan mga nakaaging SONA an nagtao an presidente nin medyo pasikat na mga datos.
Mawot man ninda na magin sinsero si PBBM asin aminon na nasala ini asin gamiton niya na sana an mga natatadang taon kan saiyang termino nganing itanos an anumang baluktot sa nacion.
Pwedesir man abuton nin sagkod duwang oras an durasyon kan magigin SONA kan Presidente asin kun may tunay man na akomplisyemento na naghingoa an administrasyon na ma-isakatupadan ini an tama sanang isabay ini sa saiyang ilalatag.
Alagad kun siya an hahaputon an wara siyang nahiling na sinserong paghampang sa problema urog na kan kakatapos na pirilian na kapansin-pansin suboot na patungkol sana sa posisyon sa 2028 election asin politika an pig-aatupag kaini.
Tawan prayoridad man suboot kan Presidente an pagpapahiling kan sensiridad huli ta an totoong paghingoa na hampangon an problema an nagpopoon sa pag-ako kan mga problema arug kan pagtaas kan presyon kan babarakalon, oil price hike, kakulangan nin trabaho asin ganansya, asin iba pang pang-urualdaw na problema kan ordinaryong Pilipino.
Pangapodan ni Africa sa publiko na dae magpasilaw sa mga basta bastang pigsasabi kan Presidente asin aramon kun totoo an mga akomplisyemento kan gobierno sa mgha problemang pigkakahampang kan ordinaryong Pilipino.
