LEGAZPI CITY — Nagpatanid an Albay provincial disaster council sa mga parasira sa coastal barangay sa eastern seaboard kan provincia na dae maglayag asin magsira kasunod kan gale warning bulletin na ipinaluwas kan Philippine Atmospheric Geophysical and Astronomical Services Administration (PAGASA).
Segun ki Cedric Daep, Albay Public Safety Emergency and Management Office (APSEMO) chief, nag-abiso sinda sa manlain-lain na disaster authorities ngane na istriktong ipautob an “no sailing” policy huli sa kayang darahon kan darakulang hukol pasiring sa Pacific Ocean an mga fishing boat asin sadit na seacrafts.
Apektado kan no-sailing policy an costales na banwaan kan Rapu-rapu, Manito, Sto. Domingo, Bacacay, Malilipot, Malinao, Tiwi kasabay na an ciudad kan Tabaco asin Legazpi.
Dugang ni Daep, nagpatanid man siya sa dakulang sea vessels na may rutang Tabaco-Catanduanes na maging alerto sa darakulang hukol na kawsa kan makusog na paros sa lugar.
Nagpaluwas an PAGASA kasuodma nin gale warning kun sain an mga seaboard kan Camarines provinces, Catanduanes, eastern coast kan Albay, Sorsogon asin Northern Samar an makakaeksperyensya nin 52-63 kilometers per hour wind force na may hukol na 3.5-4.5 meters an langkaw.
