LEGAZPI CITY – Nagpaotob na nin “no sail policy” an Municipal Disaster Risk Reduction and Management Office kan Bulusan katakod kan raot nin panahon na dadarahon kan Bagyong Aghon.
Segun kay Ken Marc Ragasa an head kan Bulusan Municipal Disaster Risk Reduction and Management Office, mahigot na munang ipinagbabawal an pagdakop nin sira asin pagbiyahe sa kadagatan ngunyan na may nakabandera pang tropical cyclone wind signal sa provincia nin Sorsogon.
Ini an bilang pag-iingat naman sa makusog na paros asin haralangkaw na ukol sa kadagatan na peligroso para sa mga bangka.
Sa paglilibot kan team kan Municipal Disaster Risk Reduction and Management Office, haros gabos na mga parasira an nagkusa ng halion an saindang bangka sa dagat.
Ikinaag na ini sa halangkaw asin salbadong lugar saka binugkosan ngani na dae madara kan makusog na paros sa pag-abot kan bagyo.
Pangapudan kan opisyal sa mga parasira na magsunod sa pigbababang abiso kan gobyerno na obheto man sanang mapangatamanan an seguridad kan publiko asin maabot an target na zero casualty tuyong may kalamidad.
