LEGAZPI CITY-Kinondena asin pinahimutikan kan National Historical Commission of the Philippines (NHCP) an pahayag kan nagkapirang Chinese scholars na nagsasabing parte kan Taiwan an Batanes Islands asin dapat suboot na sakupin kan soberanya kan China.
Segun sa ahensyan, gibo-gibo sana an nasabing alegasyon asin warang anumang basehan sa historya asin agham.
Basado sa report, an mga Chinese scholars nagsagibo nin symposium sa Jinan University kan Hunyo 30, 2026, kun saen saindang ipig-duon na an Batanes, iyo suboot an “natural geographic extension” kan Taiwan asin dating sakop kan Taiwan prefecture kan panahon kan Ming asin Qing Dynasties.
Pinahimutikan kan National Historical Commission of the Philippines na an nagsabing mga report kan British explorer na si William Dampier kan 1687, warang anumang ebidensya kan pamamayo kan ng Tsina sa Batanes, asin maliwan na an mga Ivatan an igwang sadiring pamayanan asin kalakaran.
Dagdag pa kaini, na poon kan 1783 bisto na kan gobierno Espanyol an Batanes bilang parte kan lalawigan kan Cagayan, asin poon digdi, padagos na nagin parte kan historya asin pamamayo kan Pilipinas an Batanes.
Sa panahon man kan Philippine Revolution asin Malolos Congress, an mga kinatawan na Ivatan an nagin parte na kan lehislatura kan nacion.
Pinahimutikan man kaini an argumento na dapat ibalik kan Japan sa China an Batanes makalihis an World War II, huli ta malinaw na an mga Ivatan mismo an nagpalaya sa saindang banwaan hale sa pananakop kan mga Hapon kan 1945.
Nanindugan an National Historical Commission of the Philippines na an Batanes pirmihang parte kan Pilipinas, asin may sadiring gobierno lokal asin pigbibisto kan bilog na kinaban bilang teritoryo kan nacion.
