LEGAZPI CITY- Naghagad nin dispensa an National Food Authority (NFA) Bicol sa mga naapektarang parabakal kan pagkapendiente kan release kan mga bagas.
Pag-eksplikar ni NFA Bicol Director Henry Tristeza sa intrevista kan Bombo Radyo Legazpi, naubusan nin stock na ipapabakal an warehouse kan opisina sa may pier kun kaya kinaipuhan pang magpakua nin stock sa bodega sa banwaan kan Libon na nagcausa kan pagkapendiente.
Dugang pang dae man kakayanon na matawanan an gabos na mga nakapila kaya nagdesisyon an NFA Albay provincial office na magpadara nin tawo sa pagkua kan stock.
Dawa man aminadong dakol an nakapila sa mga retail outlets, inasegurar kan opisyal na sistematiko an ipapaotob na scheme tangarig na ma-acomodar an mga nangangaipo kan baratong bagas sa paagi kan release kan mga control numbers siring man an pagkakaag nin priority lanes.
Sa lado man kan nagkapirang parabakal, diit na sakripisyo sana asin tiyagaan an pagpila urog na mas barato an presyo kan NFA rice kesa sa makukuang commercial rice sa merkado.
