LEGAZPI CITY – Inotorisa na kan National Food Authority (NFA) Bicol an anom na provincial offices sa pagdoble kan alokasyon kan ipigpapabakal na NFA rice makalihis na mairehistro kan rehiyon an pinakahalangkaw na inflation rate sa Pilipinas sa 9% kaitong nakaaging bulan.
Napag-araman na kaibanan sa mga pighihiling na factors sa pagsakat kan inflation an pagbabago sa suplay kan karne, gulay, sira asin bagas.
Sa intrevista kan Bombo Radyo Legazpi ki NFA Bicol Director Henry Tristeza, isinakat na an minimum kan sales kan NFA rice sa 5 kilo mantang nakadepende man sa distansya kan pinaghalean kan parabakal an pagdugang pa kan mababakal na bagas.
Target kaya kan NFA kaibanan an iba pang ahensya na mapababa sa 4% an inflation rate sa Bicol susog sa magigin epekto kan pagdoble kan release sa quantity kan NFA rice sa presyo kan bagas sa merkado.
Naka-monitor man an ahensya sa mga retail outlets na nagpapabakal nin labi sa P27 asin P32 na presyo kan NFA rice na isasairarom sa one-strike policy kun naprobaran an pagbayolar.
Hinale man kaini an paghadit kan publiko na mauubusan nin suplay kan bagas huli ta dae pa man tapos an unloading kan stocks resulta kan bako kontroladong kamugtakan kan panahon, siring man an paabot na inangkat na suplay asin peryodo kan anihan.
