LEGAZPI CITY- Sinierto kan National Food Authority Bicol na warang nadistrosong mga bagas sa ibong kan mga pagbaha sa saindang mga opisina.
Segun ki NFA Bicol Acting Regional Manager Julie Llenaresas sa intrevista kan Bombo Radyo Legazpi na salbado an gabos na mga bagas sa saindang mga warehouse huli ta amay na naasikaso kan mga personahe.
Paliwanag kan opisyal haros gabos na mga bodega kan ahensya an elevated kaya salbado an mga stocks nin bagas.
Huli digdi, dagos-dagos an pagpapaluwas kan ahensya nin bagas sa mga lokal na gobierno asin mga relief agencies ngani na makatabang sa mga naapektaran kan nakalihis na bagyong Kristine.
Sa presente, sinabi ni Llenaresas na pigpaparikas man an pagpapagiling kan mga stock na paroy ngani na maging bagas asin maitao sa mga nangangaipong ahensya.
Mientras tanto, sinabi kan opisyal na antes pa man an kalamidad bastante an buffer stock kan ahensya sa paroy asin bagas.
Enkaso man na magkaubusan nin buffer stocks, bukas man suboot an iba pang mga rehiyon na magpadara nin bagas ngani na makatabang sa mga naapektaran kan nasabing kalamidad.
