LEGAZPI CITY – Nahahaluyan an National Economic and Development Authority (NEDA) Bicol sa dalagan kan pagkumpleto sa patrabaho sa Bicol International Airport sa Brgy. Alobo, Daraga, Albay.
Magigirumduman na makapirang beses na mang naatras an target completion kan nasabing proyekto na pinunan taon pang 2008.
Segun ki NEDA Bicol Regional Director Agnes Tolentino sa intrevista kan Bombo Radyo Legazpi, nasasabutan man an nagkapirang rason sa pagkapendiente kaini lalo na an nakaaging mga kalamidad asin nagkapirang kariribukan na nauli pa sa panunulo nin mga heavy equipment.
Dai man pigpapasipara an posibilidad sa pag-abot kan mga raot nin panahon alagad mas marhay nang suliton an magayon na weather condition sa marikas na pagtatrabaho.
Wara pa man na investments na naglaog kasabay kan pagtitindog kan erpuerto alagad dakol na kutang nabuksang oportunidad sa manlain-lain na industriya kun operational na ini.
Mientras tanto sa isinagibong site inspection, ipighayag kan contractor sa proyekto na sa pagtatapos pa kan taon an target completion kaya naglalaom si Tolentino na baka abuton pa nin 2022 an operasyon.
