LEGAZPI CITY — Ipigbuyagyag kan National Democratic Front-Bicol (NDF-Bicol) an suboot na apat na kautikan na binutasan kan proponent kan pagpapalawig kan martial law sa Mindanao hasta sa katapusan kan taon.
Segun sa makakaliwang organisasyon, an grupo kan military experts ni Presidente Rodrigo Duterte na kumpwesto ninda Defense Secretary Delfin Lorenzana, AFP chief of staff General Eduardo Año, asin National Security Adviser (NSA) Hermogenes Esperon an nagpaluwas nin mga kautikan ngani na tawan nin katwiran an pagpapalawig kan ley martial na sinuportaran man kan mga suportadores kan presidente sa Kongreso.
Inapod na kautikan kan NDF-Bicol an pagkakaigwa nin madaliang persmiso na palawigon an martial law, an pahayag kan militar na warang nababalgar na diretsos humanos, pagpapadusa sa mga nagbabalgar sa human rigths asin an pagkakaiba kan martial law ni Duterte ki dating Presidente Ferdinand Marcos.
Dugang pa kaini, an mga pinagkondusir na combat operations kan militar, pambobomba asin aerial strikes na nagresulta sa collateral damage asin pagkagadan kan mga sibilyan an sarong klarong pagbalgar sa diretsos humanos.
Pigpoprotehiran man suboot kan gobyerno an saindang mga tauhan na imbwelto digdi magin an mga opisyal kan militar na may kinaaraman sa extra-judicial killings.
Nanindugan man an grupo na lalabanan an martial law asin padagos na makontra kun ipapaotob an ley sa rehiyong Bicol.