LEGAZPI CITY-Arestado kan Taguig City Police Office an pigkokonsiderang na No. 2 Most Wanted Person kan National Capital Region Police Office (NCRPO).
Nabisto an suspek na si Jomar Salik sa Manalili Street sa Barangay Upper Bicutan asin naarestar sa bisa kan warrant of arrest na inisyu ni Judge Marivic Cudilla Vitor kan RTC Branch 266, Taguig City, na warang pigrerekomendang piyansa.
Basado sa impormasyon kan Taguig City Police Office, nagkapirang aldaw na nagsasagino nin mabusising surveillance asin background checks an saindang intelligence operatives bago ini maarestar.
Napag-araman man na an akusado an miyembro man kan John Rol De Guzman Carnapping Group na nasa watchlist kan pulisya.
Segun kay Taguig City Police Chief Police Colonel Byron Allatog, nagin matrayumpo an operasyon huli sa epektibong teamwork asin intelligence work.
Pigomaw man kan Taguig City Mayor Lani Cayetano an marikas asin maayos na aksyon kan pulisya asin sa giraray na pigsisierto an bilog na suporta kan lokal na gobierno sa mga lakbang para sa katoninongan asin seguridad sa ciudad.
