Aminado an National Bureau of Investigation na ipigkakahadit ninda an pagdakol kan kaso nin pagbabanta o ‘death threats’ sa presente.
Segun ki National Bureau of Investigation Director Atty. Melvin Matibag, naaalarma an ahensya dapit sa nasabing isyu huli ta nagigin normal o ‘norms’ na an siring na gibo.
Huli digdi, pigduon kan opisyal na an ‘death threat cases’ an dapat na mapundo na huli ta kun magpapadagos ini, siertong makaka apektar sa pambansang seguridad kan Pilipinas.
Sinabi pa kan direktor na nahahadit man sinda huli ta magin an nagkapirang haralangkaw na opisyal an nagigibo man nin mga death threats na garing ordinaryo na sana.
Katakod kaini, sinabi kan National Bureau of Investigation na mahigot na ipigpapaotob kan ahensya an saindang mandato asin hahabulon an an mga imbwelto ngani na mamantenir an katrangkiluhan.
Alagad depensa ni NBI Dir. Atty. Matibag na an saindang aksyon an gigibuhon na nakabase sa ebidensya asin warang anuman na impluwensya nin pamumulitika.
