Ginalugad kan National Bureau of Investigation (NBI) Laguna District Office an saro pang farm sa San Pablo, Laguna na suboot pagsasadiri kan sarong pulitiko na posibleng pigtataguan kan puganteng si Atong Ang.
Ini an nganing iserbi an mandamiento de aresto laban sa negosyante na nahahampang sa kasong kidnapping asin serious illegal detention katakod kan kaso kan nawawarang mga sabungero.
Alagad segun ki Punong Barangay Maximo Castillo, wara sa lugar si Ang asin dae man naheling duman.
Sinabi kaini na sa saiyang pagkaaram, pagsasadiri ni AKO Bisaya Representative Sonny Lagon an farm asin pinahimutikan man kaini an mga bareta na nagtatago duman si Ang, na inaapod ining haka-haka sana.
Magigirumduman na dati nang pigdawit kan whistleblower na si Julie Patidongan an mambabatas bilang parte kan grupo na nakikipag-olay ki Ang nganing pag-olayan an mga isyung may kinaaraman sa nawawarang mga sabungero, alagad mahigot na pinahimutikan ni Lagon an alegasyon asin inapod na daing basehan, malisyoso, asin destructive.
Piglinaw man kaini na warang nangyaring pagtiripon sa pagultanan ninda ni Ang asin nanindugang legal an e-sabong.
Pinahimutikan man kan Barangay Chairman an suboot paglapag kan sarong helicopter sa farm na pigkakarkulong maabot sa sanggatos na hektarya asin piggagamit para sa panabong.
Kan Huwebes, Enero 15, pig-anunsyo ni Department of the Interior and Local Government (DILG) Secretary Jonvic Remulla an P10 million na bounty sa payo ni Ang huli para sa pagkakadakop sa negosyante, na pigkokonsiderar na “number 1 most wanted” sa bilog na Pilipinas.
 Laguna District Office is investigating another farm in San Pablo, Laguna allegedly owned by a politician who is possibly hiding the fugitive Atong Ang.){kind=link}