LEGAZPI CITY — Mga identification cards asin susi kan harong na sana an laog kan naibalik na bag kan sarong misis makalihis na mabiktima kan salisi gang sa banwaan kan Daraga kasuodma.
Ipinaabot kan biktimang si Imelda Barba sa hepatura kan Daraga Municipal Police Station an dapit sa pagkakawara kan saiyang bag mientras nagpila sa sarong health scanning activity sa sarong drugstore.
Segun sa biktima, antes magsairarom sa pag-scan, pinahali saiya kan health worker an mga sulot na alahas asin barya asin ikinaag sa saiyang darang handbag.
Ibinugtak sana suboot niya an bag sa baba alagad makalihis an pirang minuto, dae na ini makua.
Sa paagi kan Bombo Radyo Legazpi, nakua liwat kan biktima an saiyang gamit alagad wara na duwang singsing maging an wedding ring, relo asin kwarta.
Dinara sa istasyon kan Bombo Radyo kan sarong dae na pinangaranang jeepney driver an bag kun saen segun digdi, nadangog niya sa programa an nawawarang bag na winalat sa saiyang jeep.
Mientras tanto, sa pag-imbestigar kan Daraga PNP, sinabi ni PO3 Gerson Rentosa na nahiling sa CCTV footage kan drugstore an sarong lalaki asin babaye na nagkua kan bag na sa ngunyan pighahanap na ninda.
Inabisuhan man suboot ninda an nasabing establisiyemento na dugangan an saindang security measures asin dapat may nagmo-monitor kan CCTV ngane na maibitaran an siring na insidente.
