LEGAZPI CITY-–Pigplano ngunyan kan lokal na gobierno kan Daraga, Albay na gibohon water source an mga natural springs sa lugar.
Segun ki Local Government Unit Daraga Public Information Officer Renz Luna, sa intrevista kan Bombo Radyo Legazpi, obheto kan lakdang na makadugang sa suplay nin tubig urog na sa mga residente kan saindang banwaan.
Sa presente nagkundusir na sinda nin initial validation sa mga water springs sa Barangay Malobago kaiba an Department of Agriculture kun sain pighihiling an posibilidad na magin water source.
Dugang niya na may iba pang ahensya na saindang hahagadan nin tabang para sa pagkundusir nin quality testing sa water sources sa nasabing barangay.
En kaso man na magkaigwa nin progreso an pag-aadal kan DA an magkakaigwa nin konsultasyon urog na sa mga residentes kan sarong barangay.
Pighayag kan opisyal na an budget para digdi an gikan sa lokal na gobierno kaya kun maaprubaran an nasabing water source an mabugtak sinda nin sadiring water system siring man na papadalaganon ini kan LGU.
Tinawaan-doon ni Luna na an pagigin accessible sa sentro kan Daraga an saro sa saindang pigkokonsiderar sa paghahanap nin water sources, alagad dae man sinda nagpupundo pa sa paghahanap sa iba pang barangay na pwedesir makuwaan kaini.
