LEGAZPI CITY- Piglalaoman kan nagkapirang lehislador na mapipirmahan na bilang sarong ley sa urog na marikas na panahon an National Identification System makalihis na aprubahan na kan Senado.
Sa intrevista kan Bombo Radyo Legazpi ki Ako-Bicol Partylist Representative Alfredo Garbin Jr., ipigkokonsiderar bilang saro sa priority bills kan administrasyong Duterte an nasabing proponidong ley na pigtutubudang maisasabay pa sa State of the Nation Adress (SONA).
Dae man maitago ni Garbin an dakulang kaogmahan sa paparaning pagpasar kan inapod kaining “landmark legislation” makalihis kan maabot sa duwang dekada nang pagbusol kaini.
Mientras tanto, hinale man kaini an paghadit kan nagkapirang sektor urog na sa orolay panseguridad kun saen dakol an nagpahayag nin pagkahandal en kaso mahabas an mga personal na impormasyon.
Segun ki Garbin solamenteng an mga otorisadong tawo an magkakaigwa nin access digdi mientras na magigin confidential an detalyes na itatao kasabay kan pagbweltada na nahahandal sana digdi an mga tawong igwang kasalan sa ley kaya mawot na magtago.
Magagamit an nasabing card bako sana sa mga pampublikong transaksyon kundi magin sa pribadong transaksyon.
