LEGAZPI CITY – Kinumpirmar kan sarong transport group na magsasagibo sinda nin nationwide transport strike sa maabot na Huwebes, Setyembre 18, bilang protesta sa suboot korapsyon sa mga flood control projects kan Duterte asin Marcos administration.
Segun ki Pagkakaisa ng mga Samahan ng Tsuper at Operator Nationwide (PISTON) President Mody Floranda sa intrevista kan Bombo Radyo Legazpi na afuera sa paghagad nin paninimbagan sa mga nangyaring katiwalian an mawot man nindang ikondena an ikalimang sunod na pagtaas sa presyo kan produktong petrolyo na nagpapadifisil sainda.
Paghistorya niya na nag-aabot na sa P390 kada aldaw an nawawara sa saindang aldawang ganansya na napapaduman sana sa gastuson sa petrolyo na dakulang tabang kuta para sa saindang aldawang pangangaipuhan.
Dismayado man siya huli ta napapaduman sana sa bulsa kan mga corrupt na mga opisyal kan gobierno an mga buwis na ipigbabayad sa mga produktong petrolyo na suboot kalakaran na kan mga nasa pwesto.
Pigtaram pa kan lider kan grupo na bako sana an saindang mga myembros an dagit sa mga wala-toong korapsyon sa mga proyekto kan gobierno kundi an enterong sektor kan transportasyon huli ta dapat nagbabalik sainda an mga buwis na ipigbabayad ninda sa paagi kan magayon na serbisyo.
Pagdoon niya man na huli sa depektong mga flood control an nagigin biktima sinda kan mga serye nin pagbabaha na ngonian an simpleng uran sana an baha na sa National Capital Region asin mga tinampong pig-aagihan kan saindang sektor.
Mawot man ninda isabay sa transport strike an mapadapit sa padagos na pagbubusol kan gobierno sa Public Utility Vehicle Modernization Program (PUVMP) pati an mga serbisyo na dapat an gobierno an nagpapadalagan an ipigtatao ninda sa darakulang private companies.
Pighayag man ni Floranda na wara nang makakapugol sa gigibuhon nindang nationwide transport strike mantang nakatalaan man sindang makisumaro sa nagdadangadang na pinakadakulang paghiro sa September 21 kasabay kan anibersaryo kan deklarasyon kan Martial Law.
