LEGAZPI CITY-Ikinasa ngonian na aldaw nin Lunes an nationwide transport holiday sa pamamayo kan Alliance of Concerned Transport Organization (ACTO) huli sa piglalaoman na paglangkaw sa presyo kan langis.
Katakod kaini, dai muna nagpasada an saindang mga miembros bilang protesta sa padagos na pagkalugi kan mga jeepney driver asin operator.
Segun ki ACTO president Libay de Luna, nasasakitan na an mga drayber, kun sain nasa P150 sana an ganansya kada aldaw huli sa halangkaw na presyo kan diesel.
Piglinaw kaini na dai sinda magibo nin kariribokan alagad katuyuhan sana kaini na maipaabot sa gobierno an saindang sitwasyon.
Nangapudan an grupo nin tabang arog kan service contracting asin moratorium sa bayadan kan mga transport cooperative.
Nakikisumaro man sa transport holiday an saro pang grupo gikan sa Iloilo City, mantang naenot nang nagsagibo nin transport strike an PISTON kan Marso 19 sagkod Marso 20, 2026.
