LEGAZPI CITY- Nag-organisar nin servicio caravan an National Police Commission Bicol bilang parte kan selebrasyon kan Police Community Relations Month.
Segun ki National Police Commission Bicol Assistant Regional Director Atty. Louie Toldanes sa intrevista kan Bombo Radyo Legazpi na obheto kaini na mas mapakusog pa an relasyon asin koordinasyon kan kapulisan sa publiko.
Ini an ngani na mamantenir an katrangakiluhan sa komunidad.
Afuera sa mga kapulisan, nag-atendir man sa nasabing aktibidad na ginibo sa ciudad kan Legazpi an mga personahe kan Bureau of Fire Protection para sa mga mawot na mag-inquire dapit sa pag-secure nin building permit asin iba.
Kaibanan man an mga representante kan Bureau of Jail Management and Penology ngani na mag-cater kan mga kahaputan dapit sa mga persons deprived of liberty asin Department of the Interior and Local Government para sa pagtataong linaw sa mga requirements ngani na maideklarar an sarong lugar na klarado sa impluwensya kan ipinagbabawal na bulong.
Nagtaong impormasyon man an mga otoridad dapit sa mga retiradong uniformed personnel na igwang kahaputan dapit sa saindang mga pensions asin mga benepisyo.
Segun ki Toldanes na mawot ninda na mas magin mahigot pa an kooperasyon kan gabos na mga ahensya de gobierno sa publiko ngani na mamantenir an matrangkilong komunidad.
Sa paagi kaya kaini, pinaglalaoman na dakol na mga mamumuhunan pa an malaog sa rehiyon asin makakapag ambag sa pagtalubo kan ekonomiya kan Bicol.
