LEGAZPI CITY—Suportado kan National Parent Teachers Association an pag-implementar kan “English Only Policy” asin pighayag na an nasambit na polisiya may obheto na makaprodusir nin globally competent graduates.


Segun ki National Parent Teachers Association Vice President, Lito Sinieto, sa intrevista kan Bombo Radyo Legazpi, na oras na para iimplementar an “English Only Policy” sa senior high school asin kolehiyo huli ta Ingles an lenggwaheng piggagamit sa pag-board exam asin paghahanap nin trabaho.


Dugang kaini na huli kan modernong panahon, an mga kaakian ngunyan nakakanuod na man magtaram nin Ingles sa paagi kan pagdalan nin mga programa sa Internet.


Dakula man an matatabang kan polisiya sa research, thesis, defense kan mga estudyante kun saen Ingles an gamit sa pakikipagkomunikasyon.

Afuera sa mga pribadong eskwelahan, dapat man suboot na iadaptar na kan mga pampublikong eskwelahan an paggamit nin lenggwaheng Ingles bilang gamit sa pakikipagkomunikasyon.

Tinawan-doon pa kan opisyal na an “English Only Policy” sa laog man sana nin campus iimplementar alagad pagluwas iyo na an lenggwahe na piggagamit sa pang-uro-aldaw.

Mientrastanto, hihilingon pa ninda sa ngunyan an magigin resulta kan pag-implementar kan nasambit na polisiya.