LEGAZPI CITY- Nasa P1.3 billion an pondong itigama para sa pagtatao nin pinansyal na asistensya sa mga lokal na paraoma.
Segun ki Department of Agriculture Bicol spokesperson Lovella Guarin sa intrevista kan Bombo Radyo Legazpi na nagdugang an nakolektar na taripa sa mga imported na bagas kaya nadugangan an alokasyon para sa rehiyon sa irarom kan Rice Competetiveness Enhancement Fund.
Pigkakarkulo man na nasa 186, 309 na registered farmers sa irarom kan Registry System for the Basic Sectors in Agriculture an magigin benepisyaryo kan nasabing asistensya.
An mga ini an tagsadiri nin daga na nagtatanom sa duwang hektarya pababa.
Napag-araman man na papalawigon pa an Rice Competetiveness Enhancement Fund hasta sa taong 2031.
Marurumduman na inanunsyar kan ahensya na hali sa dating P5,000 na ayuda, linangkawan ini pasiring sa P7,000.
Obheto kaini na mapalangkaw an produksyon sa paagi kan pagbakal nin mga farm inputs asin iba pang mga pangangaipo sa pagtatanom.
