Pig-iimbestigaran kan National Police Commission (Napolcom) an pirang police generals para sa saindang posibleng pagkakambuelto sa kaso kan mga nawawarang sabungero.
Sa sarong press conference, sinabi ni Napolcom Vice Chairperson asin Executive Officer Atty. Rafael Calinisan na padagos an saindang imbestigasyon asin bako sana ini limitado sa 18 pulis na pinangaranan kan saro sa akusado asin whistleblower na si Julie Patidongan alyas Totoy sa saiyang complaint affidavit.
Segun ki Atty. Calinisan, sa nasabing numero, 12 an aktibo sa serbisyo mantang anom man an natanggal na sa serbisyo.
May mga pangaran kan mga pulis na suboot halangkaw an ranggo na dae pa naisasapubliko an padagos nindang pig-imbestigaran.
Ipighayag man ni Atty. Calinisan na alinsunod sa direktiba ni Presidente Ferdinand Marcos Jr. saindang mabusising iimbestigaran an pagkawara kan mga sabungero partikular na an posibleng pagkakaimbuelto kan mga pulis.
Magigiromdomang kan Lunes, naenot nang sinuspendir nin 90 aldaw an 12 aktibong pulis na pinangaranan ni Patidongan sa saiyang affidavit na imbuelto suboot sa kaso kan missing sabungeros.
An 11 pulis an nahahampang sa mga reklamo para sa grave misconduct asin conduct unbecoming of a police officer mantang an saro man na si Col. Jacinto Malinao Jr., na dating director kan Batangas Provincial Police Office, an pig-iimbestigaran huli sa suboot grave misconduct, grave neglect of duty asin conduct of unbecoming of a police officer.
 is investigating several police generals for their possible involvement in the case of the missing sabungeros.){kind=link}