LEGAZPI CITY — Klinaro kan Philippine Institute of Volcanology and Seismology (Phivolcs) na bako konektado an namateang pagyugo sa Sorsogon sa nangyaring linog sa Batangas.
Sa intribista kan Bombo Radyo Legazpi ki Phivolcs Director Renato Solidum, sinabi kaini na normal an nasambitan na pangyayari huli ta igwa nin nakalakop na local fault line sa manlaen-laen na parte kan nasyun na padiit-diit na naghihiro.
Sigon ki Solidum, harayo nang marhay an Batangas ngani na maitakod sa paglinog sa Sorsogon na nakaeksperyensya nin magnitude 2.5.
Saro pa sa klinaro ni Solidum na saro man sanang insidente nin pagyugo an nairehistro sa northern Samar kun sain naapektaran an mga banwaan kan Catarman, Palapag asin Mapanas.
Magigirumduman na niyugo nin 5.4 magnitude na linog an nasambitan na probinsya kun sain sigon sa Phivolcs director, nanotaran an epicenter kaini sa rayong 74 km southeast kan Palapag.
Nagkakataon man sana suboot na nagkakasarabay-sabay an mga linog sa manlaen-laen na parte kan nasyun kun kaya dae nin dapat na ikahandal an publiko.
Sa ngunyan, nangapodan si Solidum na dae basta magtubod sa mga bareta na naglalakop sa social media asin panubudan sana an Phivolcs na iyo an otorisadong ahensya sa pagpapaluwas kan mga siring na impormasyon.
