LEGAZPI CITY — Nagpadara na nin duwang engineers an Mines and Geosciences Bureau (MGB) Bicol na maimbestigar sa pinunan kan aksidente sa sarong mining site sa Sitio Bagong Sirang Barangay Panique, Aroroy, Masbate.
Sa intrevista kan Bombo Radyo, sinabi ni MGB Bicol Regional Director Danny Molina na fact finding an gigibuhon kan saindang personahes ngane araman an totoong kawsa kan aksidente asin maibitaran ng mangyari an kaparehong sitwasyon.
Ipigbuyagyag man ni Molina na bako ini an enot na nangyari an insidente huli sa kan nakalihis na semana sana, na-trap man an mag-amang Altiche harane sa pinagmiminahan kan Filminera Resources Corporation kun saen binawian man nin buhay an ama mantang nawara bigla an aki kan maisalbar ini.
Iligal suboot an ginibong pagmimina kan mag-ama na inapod na ‘mock out’ sa dating pinagtatambakan nin materyales kan dating Atlas Mining Corporation.
Mientras tanto, kasunod kan insidente, isinuhestiyon ni Molina na magkaigwa nin mahigot na pagbabantay ngane dae makalaog an mga illegal miners asin maibitaran an dae piglalaomang aksidente.
Ipigpagirumdom man ni Molina an pag-isyu liwat nin cease and desist order sa mga minahan o small scale mining sa gabos na banwaan sa probinsya.
Sa ibong na banda, nagpahayag man an opisyal na suportado ninda an gabos na polisiya na piglatag kan dating sekretaryo kan Department of Environment and Natural Resources na si Gina Lopez.
