LEGAZPI CITY — Padagos an ipigkokondusir na imbestigasyon kan mga otoridad dapit sa nakuang gadan na hawak sa banwaan kan Oas, Albay.
Segun ki PC/Insp. Domingo Tapel Jr., hepe kan Oas Municipal Police, nahiling suboot kan caretaker kan kamposanto kan Barangay Bagsa na si Reynaldo Ocfemia an nasulong hawak kan lalaki mantang naglilibot ini.
Nakigkig suboot si Ocfemia kan madiskubre ini kaya tulos na ipinaaram sa opisyal kan barangay.
Base sa inisyal na imbestigasyon kan mga Oas Municipal Police, dae pa ninda masierto kun may foul play o naghugot an dae pa mabistong biktima.
Dae man marhay nasulo an hawak kaini kun kaya mahihiling pa an mga sulot siring kan kalong puti, pantalon, puting bado, salming, relo, asin medyo brown na buhok.
May nakua man na wallet sa hawak alagad warang laog na identification card.
Naghapot-hapot naman an mga otoridad sa mga residente kan barangay alagad warang nakakabisto sa biktima.
Segun man sa ibang residente, may nahiling sindang itom na aso hale sa kamposanto kan Miyerkules na hapon alagad ipinasipara sana huli sa pagpensar na may nagsusulo sana.
Nangapudan man si Tapel sa publiko sa mga naghahanap kan nawawarang parientes, pwedesir na ipaaram sa saindang istasyon asin maberipika an impormasyon kun an nasabing bangkay an pighahanap kan mga ini.
