LEGAZPI CITY — Dakol pang preparasyon an kinakaipuhan antes na bukasan an Legazpi City Museum.
Ini an ibinuyagyag ni Darlito Perez, curator kan nasambitan na museo.
Sa ipinaabot na impormasyon ni Perez sa Bombo Radyo Legazpi, sinabi kaining dae madadagos an harani na kutang pagbubukas kan City Museum huli ta magsasagibo pa sinda nin hirarom na pag-aadal dapit sa historya kan syudad.
Habo suboot nyang magmadali urog pa na gigibuhon ining sarong historical museum.
Nagpupuon na an konstruksyon kan museo na nilalaoman na matatapos ngunyan na taon o sa enot na quarter kan taong 2018.
Ineksplikar ni Perez na ipapahiling digdi an historya kan Legazpi sa paagi kan mga importanteng dokumento arog kan mga mahale sa nasyun kan Espanya sa paagi kan mga national artists na mawot na magtabang sa pagtipon kan mga koleksyon na ibubugtak sa museum.
Magkakaigwa man nin espesyal na espasyo para sa Spanish Navigator na si Miguel Lopez de Legazpi kun sain kinua an presenteng pangaran kan syudad.
Mahihiling man suboot an mga lumang ladawan kan Legazpi sagkod sa magin syudad ini kan Hunyo 12, 1959.
Maogmang ihineras kan curator na dakol na mga historians sa parehong lokal asin nasyunal an interesadong magtabang sa nasambitan na proyekto sa paagi kan pagsagibo nin research sa mga national libraries.
Sa presente, igwa nin sadit na museo an Legazpi sa likod kan City Hall.
