LEGAZPI CITY — Dae pa nin pagkakabisto sagkod ngunyan an babaying nadukayang gadan sa baybayon kan Sitio Danlagan, Barangay Banquerohan, syudad kan Legazpi.
Enot kaini, sinabi ni Eduardo del Ayre, chief tanod kan nasambitan na barangay na mga parasisira an nagreport sainda dapit sa nahiling na gadan.
Nakadapa suboot ini sa irarom kan mga bakawan, nakahuba asin nasa stage of decomposition na.
Pigkakarkulong 40-anyos na an edad kan biktima na may langkaw na poco mas o menos 5 ft.
Dugang pa ni Del Ayre, igwa na nin enot na nagreport dapit sa nawawarang babayi na taga PNR site alagad pigkukumpirmar pa sa ngunyan kun an nadukayang hawak an pighahanap kaini.
Pigtutubudan na pirang aldaw na ining gadan huli ta haros dae na mabisto an pandok.
Dinara kan mga nagrespondeng otoridad an hawak sa punerarya mientras na pig-iimbestigaran pa an insidente.
