LEGAZPI CITY- Pigklaro kan Rapu-rapu Municipal Police sa probinsya kan Albay an report dapit sa nagpabistong miyembro kan New People’s Army (NPA) sa sarong kapitan asin nagbalo pa na mangikil.
Sa intrevista kan Bombo Radyo Legazpi ki PS/Insp. Reynaldo Castuera, hepe kan pulisya sa nasambitan na banwaan, makusog an pagtubod kaini na extortion sana talaga an tuyo kan suspek ki Brgy. Kapitan Carmelita Asuncion kan Brgy. Malobago.
Nagluluwas na duwang beses pang nag-apod an nagpabistong commander kan NPA-Albay Chapter na Santos Binamira Command kun sain sa enot na pakikipagkoordinar kaini, naghagad suboot nin kanding alagad pighayag kan opisyal na wara sindang ataman na hayop asin naghagad nin P5,000 cash.
Nakapagpadara na man nin P1,000 an nasambitan na kapitan antes pa man magsumbong sa mga otoridad asin na-trace na sa Caloocan pa an destinasyon kaini.
Sa presente pighahanap pa kan mga otoridad an responsable sa nasambitan na insidente mantang nagpagirumdom man si Castuera sa publiko na dae magtubod sa mga siring na klase nin modus asin tulos na ipaaram sa mga otoridad enkaso malaag sa parehong sitwasyon.
Marurumduman na enot na napabareta an dapit sa nasambitan na pangingikil na gagamiton suboot sa founding anniversary kan CPP-NPA sa maabot na Marso 29.
