LEGAZPI CITY — Swerteng warang nangyaring maraot sa 72-anyos na doctor makalihis na magdeklarar nin hold-up an nagpabistong pasyente sa Barangay San Juan, ciudad kan Tabaco.
Sa intrevista kan Bombo Radyo Legazpi ki Pol. Supt. Jefferson Araojo, hepe kan Tabaco City Police, makapirang beses naglaog an suspek na si Alni Bata, 40-anyos kan Barangay Bantayan sa klinika ni Dr. Rosalinda Buenaventura.
Enot kaini, dae man makapag-deklarar nin hold-up an suspek huli sa presensya kan agom kan doctor kun kaya tienempuhan na makahali an huri.
Mantang nagche-check up kan mata, nagluwas giraray an suspek asin pagbalik, kinaputan na an liog ni Buenaventura asin nagdeklara nin hold-up.
Tinutukan man nin garong screw driver an biktima alagad kan nagsabing warang kwarta asin nagkurahaw nin tabang, marekas man na nagdulag an suspek.
Nakaguno man nin atensyon an suriyaw kan doctor kun kaya nilamag an suspek asin kan makalaog sa sarong mall, digdi na nadakop kan security guard na si Anthony Jebulan.
Nasangatan naman nin attempted roberry an suspek alagad pighahalat pa kan pulisya an resolusyon hale sa fiscal’s office.
