LEGAZPI CITY — Ikinahahandal na kan publiko an magkakasunod na mga naiirehistrong insidente nin pambabadil sa manlaen-laen na parte kan rehiyong Bicol kun sain susog sa pinakahuring datos kan Police Regional Office 5 (PRO5), buminadol na sa labi sa 100 sa laog pa sana nin apat na bulan.
Katakod kaini, pigpapatutukan kan PRO5 sa pamamayo ni PC/Supt. Melvin Ramon Buenafe an pag-imbestigar sa mga nasambitan na kaso sa paagi kan Regional Investigation Division.
Napag-araman na kadaklan sa 121 na kaso nin pambabadil an nagresulta sa pagkagadan kan mga biktima asin sa probinsya kan Masbate nairehistro an pinakadakol na numero nin shooting incident na nag-abot sa 43 na kaso na sinunudan kan Albay, Camarines Sur, Sorsogon, Camarines Norte asin sarong kaso sana sa Catanduanes.
Partikular na tatawanan nin atensyon kan mga imbestigador an oras kan pangyayari, pagkabisto kan mga biktima asin suspek, motibo sa pambabadil, siring man an numero kan mga tawong may kapot kan badil.
Sa huri, tinawan duon kan PNP Bicol na gigibuhon ninda an gabos ngani na maibitaran an pagdakol pa kan mga biktima kan mga siring na insidente.
